Nagari Radio

Kirista Ya Gina Katafaren Masallaci a Ƙauyensa a Jihar Nasarawa

Wani ɗan siyasa kuma shugaban jam’iyyar APC na jihar Nasarawa, Dr. John D. W. Mamman, ya girgiza zukatan mutane bayan ya gina katafaren Masallacin Juma’a a ƙauyensa na Dari, da ke cikin ƙaramar hukumar Kokona, jihar Nasarawa.

Dr. Mamman, wanda Kirista ne, ya bayyana cewa aikin nasa na gina masallacin na da nasaba da ƙarfafa haɗin kai da zaman lafiya tsakanin musulmai da kiristoci, da kuma nuna muhimmancin haɗin kai a cikin al’umma.

Masallacin da ya gina an ce ya ci kuɗi mai yawa, kuma zai riƙa ɗaukar daruruwan muminai a kowace Juma’a. A cewarsa, “zaman lafiya da ɗan’uwa tsakanin kowane addini shi ne ginshiƙin ci gaban kowace al’umma.”

Wannan lamari ya jawo yabo daga al’ummar Dari da kewaye, inda shugabanni na addini suka bayyana shi a matsayin abin koyi ga sauran manyan ’yan siyasa da attajirai, domin nuna soyayya da goyon baya ga al’umma ba tare da nuna bambanci na addini ba.

Al’ummar musulmi a garin sun bayyana godiyarsu, suna cewa wannan aiki na Dr. Mamman ya nuna cewa addinai biyu na iya zama lafiya tare, tare da taimakon juna wajen raya rayuwar jama’a.