Nagari Radio

'Yan Bindiga Sun Kai Hari a Jihar Zamfara, Sun Sace Mutane 30

Wasu 'yan bindiga sun kai mummunan hari a wani kauye da ke cikin Jihar Zamfara, inda suka sace akalla mutum 30 daga cikin mazauna yankin.

Rahotanni sun bayyana cewa maharan sun kutsa cikin garin ne da daddare, inda suka bude wuta kan mazauna kafin su yi awon gaba da mata, maza da matasa.

Wani mazaunin yankin ya ce babu jami’an tsaro a lokacin da harin ya faru, lamarin da ya bai wa 'yan bindigar damar gudanar da ta’addancinsu cikin sauki.

Har yanzu ba a samu bayani daga hukumomin tsaro ko gwamnatin jihar Zamfara ba dangane da harin.

Zamfara ta dade tana fama da matsalar 'yan bindiga da ke addabar al’umma tare da sace mutane domin neman kudin fansa.