Nagari Radio

Gwamna Nasir Idris na Jihar Kebbi ya gabatar da tsare-tsaren kasafin kuɗin shekarar 2026 na kimanin Naira biliyan 642 gaban Majalisar Dokokin Jihar Kebbi.

Kasafin, mai taken “Kasafin Sauyi da Ƙarfafa Al’umma,” ya mayar da hankali kan ci gaban ɗan adam, sauyi, da ɗorewar ayyuka, ta hanyar zuba jari mai yawa a bangaren gine-gine da raya ƙasa.

A cewar Gwamnan, kasafin ya haɗa da samar da Kebbi State Security Trust Fund domin tunkarar matsalolin tsaro da ake fuskanta, ciki har da sace ɗaliban makarantar Maga. Za a ba wa asusun tsaron tallafin farawa na Naira biliyan 3, wanda ake sa ran zai inganta tsaro a al’ummomi.

Yayin gabatar da kasafin, Gwamna Idris ya bayyana cewa kashi 75% na kasafin gaba ɗaya (₦479bn) an ware shi ne domin manyan ayyuka (capital expenditure), yayin da kashi 25% (₦163bn) ya tafi ga kashe-kuɗaɗen yau da kullum (recurrent expenditure).

Ya ƙara da cewa za a biya kasafin kuɗin ne ta hanyar rabon kuɗin tarayya (FAAC), kuɗin VAT, da kuma kudaden cikin gida na jihar (IGR).

A bangaren gine-gine, Gwamnan ya ce nan da farkon watannin shekarar 2026, Asibitocin Gabaɗaya na Zuru, Bena, da Wasagu, da sauran muhimman ayyuka, za su kammala.

Haka kuma, kasafin zai mayar da hankali kan faɗaɗa gyaran birane. A bangaren shari’a kuwa, gwamnati za ta samar da tsarin digital case management a kotunan jihar domin hanzarta yanke hukunci da inganta gudanar da shari’a.

A jawabin sa, Kakakin Majalisar Dokoki Usman Muhammad ya gode wa Gwamnan bisa aiwatar da muhimman ayyuka masu amfani ga jama’a, kamar yadda aka gani a kasafin kuɗin 2025.

“Mu na da kyakkyawar alaƙa da kai—ta girmamawa da haɗin kai. Ina tabbatar maka cewa za mu amince da dokar nan zuwa mako mai zuwa,” in ji Kakakin Majalisar.