Nagari Radio

Yan bindiga sun yi garkuwa da wani malamin coci a Jihar Kaduna tare da kashe shi bayan rashin biyan kudin fansa.

Rahotanni sun bayyana cewa tun farko masu garkuwar sun nemi a biya Naira miliyan 600 a matsayin kudin fansa kafin su saki malamin, amma daga baya sun rage bukatarsu zuwa Naira miliyan 200.
Duk da wannan sauƙin, ba a samu warware matsalar ba har zuwa lokacin da aka tabbatar da kashe malamin.

Majiyar cocin ta tabbatar da cewa matar malamin da ’yarsa har yanzu suna hannun ’yan bindigar, kuma kokarin ganin an ceto su na cigaba.

Wani jigo a cocin ya ce lamarin ya jefa al’umma cikin tashin hankali da takaici, yana kira ga hukumomin tsaro da su dauki matakin gaggawa domin ceto sauran wadanda ke tsare.

Haka kuma mazauna yankin sun nemi gwamnati ta kara tsaurara matakan tsaro, duba da yadda hare-haren ’yan bindiga ke kara kamari a wasu sassan Jihar Kaduna.