Yan Sanda Sun Dakile Harin ‘Yan Bindiga a Kebbi, Sun Kwato Dabbobi 141
Sunday, 30 Nov 2025 00:00 am

Nagari Radio

‘Yan Sanda Sun Dakile Harin ‘Yan Bindiga a Kebbi, Sun Kwato Dabbobi 141

Rundunar ‘Yan Sandan Jihar Kebbi ta sanar da cewa jami’anta sun yi nasarar dakile wani mummunan hari da ‘yan bindiga suka yi niyyar kai wa a wani yankin jihar, tare da kwato dabbobi 141 da aka sace.

A wata sanarwa da rundunar ta fitar, ta ce nasarar ta biyo bayan bayanan sirri da ta samu daga mazauna yankin, wanda hakan ya ba jami’an tsaro damar gaggauta tura tawaga ta musamman domin dakatar da ‘yan bindigan kafin su aikata barna.

A cewar rundunar, an samu musayar wuta tsakaninsu da ‘yan bindigan, lamarin da ya tilasta wa miyagun tserewa zuwa cikin daji, suna barin dabbobin da suka sace a baya.

Rundunar ta tabbatar da cewa babu asarar rai daga bangaren jami’an tsaro, yayin da aka ci gaba da sintiri domin tabbatar da zaman lafiya a yankin tare da fatattakar sauran miyagun da suka tsere.

Ta kara da cewa dabbobin da aka kwato za a mika su ga masu su bayan kammala bincike, tare da jaddada bukatar al'umma su ci gaba da ba da hadin kai da sahihan bayanai domin taimakawa wajen magance ayyukan ta’addanci a jihar.