Nagari Radio

Kotu Ta Ba Malami (SAN) Belin Wucin Gadi Bisa Tsauraran Sharudda

Wata babbar kotu da ke birnin tarayya Abuja ta bayar da belin wucin gadi ga tsohon Ministan Shari’a kuma Babban Lauyan Ƙasa, Abubakar Chika Malami (SAN).

Rahotanni sun bayyana cewa kotun ta yanke wannan hukunci ne bayan sauraron buƙatar belin da lauyoyinsa suka gabatar, inda suka nuna cewa Malami na da niyyar bin dukkan sharuddan da kotu za ta gindaya masa.

Kotun ta bayar da belin ne bisa wasu tsauraran sharudda, ciki har da gabatar da masu tsaya masa, da kuma tabbatar da cewa zai ci gaba da halartar zaman kotu a duk lokacin da aka tsara.

Sai dai duk da bayar da belin, kotun ta jaddada cewa shari’ar na ci gaba da gudana, kuma ba a yanke hukuncin ƙarshe kan tuhume-tuhumen da ake yi masa ba.

Ana sa ran za a ci gaba da sauraron ƙarar a wani lokaci da kotu za ta sanar, yayin da masu gabatar da ƙara ke ci gaba da gabatar da hujjoji a gaban kotu.