Hukumomin Tsaro na Najeriya Sun Kama Manyan Shugabannin Ƙungiyar Ta’addanci ta Ansaru

Hukumomin Tsaro na Najeriya Sun Kama Manyan Shugabannin Ƙungiyar Ta’addanci ta Ansaru

Hukumomin tsaro na Najeriya sun tabbatar da cafke wasu manyan shugabannin ƙungiyar ta’addanci ta Ansaru, wacce ke da alaƙa da ƙungiyar Al-Qaida. Mai ba wa shugaban ƙasa shawara kan harkokin tsaro, Malam Nuhu Ribadu ne ya bayyana hakan a yayin wani taron manema labarai da shugabannin tsaro na ƙasa suka gudanar a Abuja. 

Ribadu ya ce wannan nasara ta samu ne sakamakon bincike da dabarun hadin gwiwar jami’an tsaro, domin kawo ƙarshen ayyukan ta’addanci a ƙasar.

Daga cikin wadanda aka kama akwai Mahmud Muhammad Usman wanda aka fi sani da Abu Barra, da kuma Abubakar Abba wanda ake kira da Mahmud Al-Nigeri ko Malam Mamuda. 

Ribadu ya ce cafke wadannan shugabannin na daga cikin manyan nasarorin da gwamnati ke samu wajen ragargazar ƙungiyoyin ta’addanci, tare da tabbatar da zaman lafiya da tsaro ga al’umma.