Guinness World Records ta yi wa Hilda Baci fatan alheri a ƙoƙarinta na girki mafi girma na jollof rice

Guinness World Records ta yi wa Hilda Baci fatan alheri a ƙoƙarinta na girki mafi girma na jollof rice

Guinness World Records ta aike da saƙon ƙarfafawa ga fitacciyar chef ɗin Najeriya, Hilda Baci, yayin da take ƙoƙarin girka mafi girman jollof rice na salon Najeriya a duniya.

Hukumar Guinness ta nuna goyon bayanta ta hanyar sake wallafa wani bidiyo daga bikin ranar Juma’a a shafin X (wanda a da ake kira Twitter), inda suka rubuta: "Me ake dafawa ne?"

Suka kara da cewa: *“Muna yi wa @hildabacicooks fatan alheri yayin da take ƙoƙarin kafa sabon tarihin duniya na girki mafi girma na jollof rice na Najeriya yau.”*

Hilda Baci, wacce ta sami shahara ta duniya a shekarar 2023 bayan kafa tarihin Guinness na tsawon lokaci da mutum guda ya yi yana girki ba tare da tsayawa ba, ta fara wannan ƙalubalen nata na baya-bayan nan a otal ɗin Eko Hotel and Suites, Legas.