ECOWAS ta musanta zargin kisan gillar Kiristoci a Najeriya, ta nuna goyon baya ga gwamnati

ECOWAS ta musanta zargin kisan gillar Kiristoci a Najeriya, ta nuna goyon baya ga gwamnati

Kungiyar ECOWAS ta musanta zargin da tsohon shugaban Amurka Donald Trump ya yi cewa ana kisan gillar Kiristoci a Najeriya, tana mai cewa irin waɗannan maganganu ba su da tushe, kuma suna iya haifar da rarrabuwar kai da rashin zaman lafiya a yankin.

A cikin wata sanarwa da ta fitar a ranar Talata, kungiyar ta bayyana cewa rahotanni masu zaman kansu sun tabbatar da cewa aikace-aikacen ta’addanci a yankin Afirka ta Yamma ba sa nuna bambanci tsakanin addini ko ƙabila.

ECOWAS ta jaddada cewa, “ta’addanci ba ya bambanci tsakanin Musulmi da Kiristoci, ko mace da namiji, ko dattijo da yaro,” tana mai kira ga ƙasashen duniya da su guji amincewa da irin waɗannan “ƙarya masu haɗari” da nufin tayar da fitina.

Kungiyar ta kuma bukaci Majalisar Ɗinkin Duniya da sauran abokan haɗin gwiwa da su ƙara tallafa wa ƙasashen yankin wajen yaƙi da ta’addanci da ke barazana ga rayuwar jama’a gaba ɗaya.