Ƴan Bindiga Sun Kashe Ƴan Sanda Biyar a Jihar Bauchi

Ƴan Bindiga Sun Kashe Ƴan Sanda Biyar a Jihar Bauchi

Daga Yusuf Gama

An samu mummunan hari a jihar Bauchi yayin da wasu ƴan bindiga suka kashe jami’an ƴan sanda biyar a cikin wani kwanton bauna da suka kai a daren Litinin.

Lamarin ya faru ne a yankin ƙaramar hukumar Ningi, inda maharan suka bude wuta kan tawagar jami’an da ke gudanar da sintiri a yankin da ake fama da matsalolin tsaro.

Bisa bayanan da muka tattara, ƴan bindigar sun yi amfani da makamai masu ƙwanƙwasa harsashi, lamarin da ya jefa jami’an cikin halin rashin samun mafaka cikin gaggawa. An dai tabbatar da cewa an kashe jami‘ai biyar a wurin harin.

A wata sanarwa da rundunar ƴan sandan jihar Bauchi ta fitar, ta tabbatar da faruwar lamarin, tare da bayyana cewa an tura ƙarin jami’ai da kayan aiki domin gudanar da bincike da kuma ɗaukar mataki kan maharan.

Kwamishinan ƴan sandan jihar, ya ce rundunar ba za ta yi ƙasa a gwiwa ba wajen farautar waɗanda suka aikata wannan ta’asa, tare da tabbatar da cewa za su fuskanci hukunci.

Gwamnatin jihar ta yi tir da harin, tana mai cewa za ta ƙara haɗin gwiwa da hukumomin tsaro domin ganin an dawo da zaman lafiya a yankunan da ke fama da barazanar ƴan bindiga, musamman a Ningi da dazuzzukan da ke kewaye.

Wannan hari ya ƙara jaddada matsalolin tsaro da ake fuskanta a wasu sassan jihar Bauchi, duk da ƙoƙarin da hukumomi ke yi na murƙushe aikata laifuka da rikice-rikice.